खड्गकाली मा.वि.मा राष्ट्रिय शिक्षा दिवस विविध रचनात्मक कार्यक्रम गरि मनाइयो
श्री खड्गकाली माध्यमिक विद्यालय चापाकोट न.पा. ४, घुर्लिचौर, स्याङ्जाले २०८२ असोज २ गते बुधबार “ज्ञान, विज्ञान, सिप, उद्यम र मौलिकताः साझेदारी र प्रणालीगत सक्षमता" भन्ने आदर्श नाराको साथ रेडक्रसको आयोजनमा राष्ट्रिय शिक्षा दिवस विविध रचनात्मक कार्यक्रम गरि मनाएको छ।
कार्यक्रममा विद्यार्थीहरूको सिर्जनात्मक क्षमता र पठन सीपलाई उजागर गर्ने उद्देश्यले विभिन्न प्रतियोगिताहरू आयोजना गरिएको थियो। कक्षा १ देखि ३ सम्म कक्षागत तथा ४ र ५ का विद्यार्थीहरूमा अन्तरसदनात्मक अंग्रेजी भाषाको स्पेलिङ कन्टेस्ट सञ्चालन गरिएको थियो। त्यसैगरी, कक्षा ६ देखि १० सम्मका विद्यार्थीहरूले विज्ञान प्रदर्शनी गरे।
प्रतियोगितामा कक्षा १-३ को स्पेलिङ कन्टेस्टमा कक्षा १ बाट प्रयुस सारु, कक्षा २ बाट अनुराग काफले र कक्षा ३ बाट बर्षा खाँण प्रथम भएका छन् । त्यस्तै; कक्षा ४ र ५ अन्तरसदनात्मक रुपमा सञ्चालन गरिएको स्पेलिङ कन्टेस्टमा अन्नपूर्ण सदन प्रथम भएका छन् । उक्त सदनमा कक्षा ४ बाट सिमा क्षेत्री र संगम गुरुङ तथा कक्षा ५ बाट गौसम खाँण र सागर गुरुङ रहेका थिए । 
त्यसैगरी, विज्ञान प्रदर्शनी तर्फ कक्षा ६ बाट संस्कृति सारु, कक्षा ७ बाट अप्सन मल्ल, कक्षा ८ बाट बिनोद खाँण, ९ बाट इस्मी मल्ल र १० बाट नोमिस्का गुरुङले आ-आफ्नो कक्षाबाट प्रथम स्थान हासिल गर्न सफल भए। सर्वोत्कृष्ट प्रदर्शनी भने कक्षा ७ का अप्सन मल्लले गरे । उक्त प्रतियोगिताको निर्णायक विज्ञान शिक्षकहरु अविषेक अधिकारी र जगदीशप्रसाद यादव रहनुभएको थियो ।
विद्यालयका प्रधानाध्यापक लेस बहादुर खाँणको प्रमुख आतिथ्यता र रेडक्रसको अध्यक्ष इस्मी मल्लको अध्यक्ष्यतामा भएको उक्त कार्यक्रम रेडक्रसको सचिव एलिजा रानाले सञ्चालन गरेका थिए । कार्यक्रमको अन्त्यमा सम्पूर्ण विजयी विद्यार्थीहरुलाई पुरस्कार प्रदान गरियो । कक्षा १ देखि ५ सम्मकालाई विद्यालयले र कक्षा ६ देखि १० सम्मका प्रतियोगीहरुलाई रेडक्रसका पदाधिकारीहरुले पुरस्कार प्रायोजन गरेका थिए । 
