खड्गकाली मा.वि. चापाकोट-४, स्याङ्जामा आज मिति २०८० असोज १२ गते शुक्रबार प्रथम त्रैमासिक परीक्षा २०८० को नतिजा प्रकाशन, प्रगति विवरण तथा पुरस्कार वितरण कार्यक्रम सफलतापूर्वक सम्पन्न भएको छ । चापाकोट नगरपालिकाका सम्पुर्ण सामुदायिक एवं संस्थागत विद्यालयहरुमा एकरुपता हुने गरि भदौ ६ गतेदेखि संचालित परीक्षाको नतिजा आज प्रकाशन भएको हो ।
शिक्षक पशुपति पौडेलद्वारा सञ्चालित कार्यक्रमको प्रमुख अतिथि 'जिल्ला समन्वय समिति' स्याङ्जाका सदस्य गिता खाँण रहनु भएको थियो र विशिष्ट अतिथिमा चापाकोट नगरपालिका वडा नं. ४ का वडा सदस्य बिष्णु देवी वि.क रहनुभएको थियो । कार्यक्रममा अन्य नगर वडा समितिका पदाधिकारी, वर्तमान तथा भू.पू. वि.ब्य.स. अध्यक्ष, विद्यालय संस्थापक, सल्लाहकार, अक्षयकोषदाता, राजनितीक दलका पदाधिकारी, आमा समूह, शिक्षक अभिभावक संघ तथा टोल शिक्षा समितिका सदस्य एवम् युवाक्लवका प्रतिनिधिहरु अतिथिको रुपमा रहनुभएका थिए । छिमेकी विद्यालयका विद्यार्थी, शिक्षक, वाल क्लव, रेडक्रस लगायत अन्य विभिन्न संघ संस्थाका व्याक्तित्व, वर्तमान तथा भू.पू. विद्यार्थी, अभिभावक र अन्य अतिथिहरुको समेत उल्लेख्य उपस्थिती रहेको थियो ।
कार्यक्रममा शिक्षक कोपिला रोका के.सी.द्वारा स्वागत मनतव्य व्यक्त भयो । भौतिक तथा प्राविधिक पक्षमा सम्पन्न विद्यालयको शैक्षिक गुणस्तर पनि नमूना हुनुपर्ने र त्यस कुरामा कटिबद्ध रहने प्रतिबद्धता जाहेर गर्दै शिक्षक ढाकाराम भट्टराई (आयुश)ले आफ्नो मनतब्य व्यक्त गर्नुभयो । उहाँले विद्यार्थीहरुको समग्र नतिजाको बारेमा विश्लेषणात्मक टिप्पणी गर्नुभयो । अपेक्षित प्रतिफल प्राप्त गर्न समग्र पक्षहरु जिम्मेवार हुनुपर्ने कुरा प्रष्ट्याउँदै विद्यार्थीहरुलाई विभिन्न सुझावहरु समेत दिनुभयो । विद्यालयको शैक्षिक गुणस्तरमा सुधार ल्याउनको लागि विद्यार्थीहरु स्वयंले हरसम्भव कोशिस गरिरहनुपर्ने र अभिभावहरुले पनि सोही अनुरुप वातावरण सिर्जना गर्नुपर्ने कुरा प्रस्ट्याउँदै शिक्षक जगदीश प्रसाद यादबले आफ्नो मनतव्य व्यक्त गर्नुभयो । उहाँले विद्यालयमा शिक्षक, विद्यार्थी र अविभावकहरु बिच प्रत्यक्ष एवम् त्रिकोणात्मक सम्बन्ध कायम भएमा मात्र विद्यालयको शैक्षिक गुणस्तरको परिकल्पना गर्न सकिने कुरा स्पस्ट पार्नुभयो ।
विद्यार्थी प्रतिनिधिको रुपमा कक्षा १० की छात्रा सीता थापाले विगतका दिनहरूमा विद्यालयले रचेको किर्तिमान आफूलेहरुले पनि कायम गर्ने र विद्यालयको गरिमा सदैब उच्च राखिराख्ने भाव प्रस्तुति सहित आफ्नो मनतब्य प्रस्तुत गरे ।
विद्यालयका प्रधानाध्यापक लेस बहादुर खाँणले नेपाल शिक्षक महासंघले आह्वान गरेर गत असोज ३ गतेदेखि सुरु भएको काठमाडौं केन्द्रित शिक्षक कर्मचारी आन्दोलनको कारण अबरुद्ध दुई दिनको पढाईको निम्ति सम्पूर्ण विद्यार्थी तथा अभिभावकहरुसंग माफी माग्दै यसको क्षतिपूर्ति स्वरूप आगामी विदाको दिनहरुबाट व्यवस्था मिलाउने कुरा बताउनुभयो । उहाँले शिक्षक आन्दोलनमा विगत दुई दशक यताको शिक्षक दरबन्दीको अभावलाई पदपूर्ति गर्ने गरि वार्ता सम्झौता भएको र यसले सम्पूर्ण शिक्षा जगतमा दिर्घकालिन फाइदा पुर्याउने कुरा स्पस्ट पार्नुभयो । सरस्वती मन्दिर निर्माणको निम्ति आर्थिक सहयोग गर्नुहुने सम्पूर्ण दाताहरुलाई समेत धन्यबाद दिँदै उहाँहरूको योगदानको कदरस्वरुप शिलालेखमा नामावली प्रकाशित गर्ने योजना रहेको कुरा समेत उहाँले बताउनुभयो । उहाँले विद्यार्थीहरुको शैक्षिक गुणस्तरमा सुधार गर्ने छिटै टोल शिक्षा समितिको गठन गर्ने कुरा पनि बताउनुभयो ।
कार्यक्रम प्रमुख अतिथीको रुपमा रहनुभएका जिल्ला शिक्षा समन्वय समितिका सदस्य गिता खाँणले विद्यालयको जुनसुकै पक्षको उन्नयनमा प्रत्यक्ष वा परोक्ष रुपमा आफूले भूमिका खेलिरहने प्रतिबद्धता जाहेर गर्दै मनतव्य दिनुभयो ।
कार्यक्रमको बिचमा विद्यार्थीहरुद्वारा सांस्कृतिक कार्यक्रम तथा प्रतिभाहरु प्रस्तुत भयो । कक्षा नर्सरीदेखी कक्षा दससम्मका विद्यार्थीहरुको नतिजा सुनुवाइ भयो र नतिजा सुनुवाइ संगै सम्पूर्ण उतिर्ण र विभिन्न स्थान हासिल गर्न सफल विद्यार्थीहरुलाई पुरस्कार वितरण भयो । कार्यक्रममा विगतको शुक्रबारे कार्यक्रम तथा अतिरिक्त कृयाकलापहरुमा विजयी विद्यार्थीहरुलाई समेत पुरस्कार वितरण भयो ।
कार्यक्रमको अन्त्यमा सभापतिको रुपमा रहनुभएको वि.व्य.स.का अध्यक्ष तिलक बहादुर खाँणले अभिभावकहरुलाई आफू व्यवस्थापन समितिको अध्यक्ष भएको हैसियतले आफ्नो जिम्मेवारी हरसम्भव पूरा गरेको कुरा स्पस्ट पार्दै विद्यार्थीहरुलाई सिकाइको निम्ति सधैं अभ्यस्त रहिरहन अनुरोध अनुरोध गर्दै उपस्थित सम्पूर्ण अतिथि तथा अभिभावकहरुलाई धन्यबाद ज्ञापन गर्दै कार्यक्रमको समापन गर्नुभयो । कार्यक्रमको समाप्ति पश्चात हरेक कक्षामा विद्यार्थी, अविभावक, कक्षा शिक्षक, प्र.अ र अन्य वि.व्य.स.का सदस्यहरु बिच विद्यार्थीको प्रगति सम्बन्धमा अन्तरकृया तथा प्रोग्रेस कार्ड वितरण भयो ।
.jpg)
