2026-11-06

खड्गकाली माविमा अन्तर-सदन देउसी-भैलो प्रतियोगिता तथा शुभकामना आदानप्रदान कार्यक्रम सम्पन्न

खड्गकाली माविमा अन्तर-सदन देउसी-भैलो प्रतियोगिता तथा शुभकामना आदानप्रदान कार्यक्रम सम्पन्न

स्याङ्जा, कार्तिक २०
श्री खड्गकाली माध्यमिक विद्यालय, चापाकोट–४, स्याङ्जामा तिहार पर्वको पावन अवसरमा अन्तर-सदन देउसी-भैलो प्रतियोगिता तथा शुभ दीपावलीको शुभकामना आदानप्रदान कार्यक्रम भव्य र हर्षोल्लासपूर्ण वातावरणमा सम्पन्न भएको छ। विद्यालयको बाल क्लबको सक्रिय आयोजनामा सञ्चालित उक्त कार्यक्रमले विद्यालय परिसरलाई सांस्कृतिक उल्लास र उत्सवमय वातावरणले भरिपूर्ण बनाएको थियो।
विद्यालयको बाल क्लबका अध्यक्ष दिप्सन थापाको अध्यक्षतामा सम्पन्न कार्यक्रममा विद्यालयका प्रधानाध्यापक लेस बहादुर खाँण प्रमुख अतिथिका रूपमा उपस्थित हुनुहुन्थ्यो। कार्यक्रममा विद्यालयका शिक्षक–शिक्षिका, कर्मचारी, अभिभावक तथा विद्यार्थीहरूको उत्साहजनक सहभागिता रहेको थियो। नेपालीहरूको महान् पर्व तिहारको मौलिक संस्कृति, परम्परा तथा लोककलाको संरक्षण र संवर्द्धन गर्ने उद्देश्यले आयोजित प्रतियोगिताले सम्पूर्ण विद्यालय परिवारमा दीपावलीको उमङ्ग थपेको थियो।
बाल क्लबद्वारा आयोजित प्रतियोगितामा विद्यालयका विभिन्न सदनहरूले आ–आफ्ना आकर्षक तथा मौलिक सांस्कृतिक प्रस्तुतिहरू प्रदर्शन गरेका थिए। प्रतियोगिताको निर्णायक मण्डलमा शिक्षकहरू शिव गिरी, तुलसी सारू र भूमिका थापा रहनुभएको थियो।
निर्णायक मण्डलको मूल्याङ्कनअनुसार प्रतियोगितामा बागमती सदन प्रथम, गण्डकी सदन द्वितीय, कोशी सदन तृतीय र मधेश सदन चतुर्थ भएका थिए।
प्रतियोगितापश्चात् आयोजित खुला नृत्य कार्यक्रममा विद्यार्थीहरूले उत्साहपूर्वक सहभागिता जनाएका थिए। उक्त कार्यक्रममा उत्कृष्ट नृत्य प्रस्तुत गर्ने विद्यार्थीलाई शिक्षक शिव गिरीले पुरस्कार प्रदान गर्नुभएको थियो। विभिन्न सदनका विद्यार्थीहरूले प्रस्तुत गरेका आकर्षक देउसी-भैलो गीत, नृत्य तथा विविध सांस्कृतिक प्रस्तुतिहरूले उपस्थित दर्शकहरूलाई मन्त्रमुग्ध बनाएका थिए।
कार्यक्रममा प्रमुख अतिथिका रूपमा मन्तव्य व्यक्त गर्दै प्रधानाध्यापक लेस बहादुर खाँणले मौलिक संस्कृति र परम्पराको संरक्षण तथा संवर्द्धन गर्दै समाजमा विद्यमान विकृति र विसङ्गतिहरूलाई निरुत्साहित गर्नुपर्नेमा जोड दिनुभयो। साथै, उहाँले हिन्दू धर्मावलम्बीहरूको महान् पर्व दीपावली, छठ पर्व तथा नयाँ वर्ष नेपाल संवत्को सुखद अवसरमा सम्पूर्ण शिक्षक, कर्मचारी, विद्यार्थी तथा अभिभावकहरूमा शुभकामना व्यक्त गर्नुभयो।
कार्यक्रमको उत्तरार्धमा प्रतियोगितामा उत्कृष्ट स्थान हासिल गर्ने विजयी सदनहरू तथा सहभागी विद्यार्थीहरूलाई विद्यालयका प्रधानाध्यापक, सहायक प्रधानाध्यापक र शिक्षकहरूबाट टीका तथा पुरस्कार वितरण गरिएको थियो।
कार्यक्रमको सञ्चालन अतिरिक्त कार्यक्रम संयोजक गोकर्ण जिसीको सहजीकरणमा बाल क्लबका सचिव अमृत पौडेलले गर्नुभएको थियो। अन्त्यमा, कार्यक्रमका सभापति दिप्सन थापाले सम्पूर्ण अतिथि, शिक्षक, कर्मचारी तथा सहभागी विद्यार्थीहरूलाई धन्यवाद ज्ञापन गर्दै आगामी दिनहरूमा पनि यस्ता सिर्जनात्मक, रचनात्मक तथा सांस्कृतिक कार्यक्रमहरूलाई निरन्तरता दिने प्रतिबद्धता व्यक्त गर्नुभयो।
यस प्रकारको कार्यक्रमले विद्यार्थीहरूमा अन्तर्निहित प्रतिभा प्रस्फुटन गर्न, आपसी सद्भाव र सहकार्यको भावना विकास गर्न तथा नेपाली मौलिक कला, संस्कृति र परम्पराको संरक्षणमा महत्त्वपूर्ण योगदान पुर्‍याएको छ।

2026-09-18

खड्गकाली मा.वि. मा वतृत्वकला कार्यक्रम तथा गणित प्रदर्शनी कार्यक्रम सम्पन्न

खड्गकाली मा.वि. मा वतृत्वकला कार्यक्रम तथा गणित प्रदर्शनी कार्यक्रम सम्पन्न

श्री खड्गकाली माध्यमिक विद्यालय, चापाकोट-४, घुर्लिचौर, स्याङ्जामा आज मिति २०८३ असोज २ गते राष्ट्रिय शिक्षा दिवसको अवसरमा जुनियर रेडक्रस सर्कलको आयोजनामा शुक्रबारे अतिरिक्त क्रियाकलाप अन्तर्गत कक्षा १–५ मा वक्तृत्वकला कार्यक्रम र कक्षा ६–१० मा गणित प्रदर्शनी प्रतियोगिता सञ्चालन भएको छ।
​वक्तृत्वकलातर्फ कक्षा ४ बाट इच्छा मल्ल प्रथम, विश्वास विक द्वितीय, र वर्षा खाँण तथा दिप्सन शाही तृतीय भएका छन् भने कक्षा ५ बाट युशिका थापा प्रथम, बबिन गुरुङ द्वितीय र शिव थापा तृतीय भएका छन्।
​त्यसैगरी, गणित प्रदर्शनी प्रतियोगिता तर्फ कक्षा ६ बाट सागर गुरुङ प्रथम, रोशनी खाँण तथा डोलबहादुर राना द्वितीय र अनमोल खाँण तृतीय भएका छन्। कक्षा ७ बाट रोशनी पौडेल प्रथम र बिनिता गुरुङ द्वितीय भएका छन् भने कक्षा ८ बाट विसुम खाँण प्रथम, अप्सन मल्ल द्वितीय र प्रशन्न खाँण तृतीय भएका छन्।
​कक्षा ९ बाट विनोद खाँण प्रथम, सुजिना खाँण द्वितीय र रिमबहादुर कुँवर तृतीय भएका छन्, र कक्षा १० बाट इश्मी मल्ल प्रथम, निस्मा गुरुङ द्वितीय र अन्जिता खाँण तृतीय हुन सफल भएका छन्। प्रतियोगितामा विजयी सम्पूर्ण छात्रछात्राहरूलाई बधाई तथा शुभकामना! साथै, उहाँहरूलाई विद्यालयबाट पुरस्कृतसमेत गरिनेछ।

2026-08-21

खड्गकाली मा.वि. मा प्रथम त्रैमासिक परीक्षा २०८३ को नतिजा प्रकाशन तथा प्रगति विवरण वितरण कार्यक्रम सम्पन्न

खड्गकाली मा.वि. मा प्रथम त्रैमासिक परीक्षा २०८३ को नतिजा प्रकाशन तथा प्रगति विवरण वितरण कार्यक्रम सम्पन्न

खड्गकाली माध्यमिक विद्यालयमा चापाकोट नगरपालिका वडा नं. ४ घुर्लिचौर स्याङ्जामा मिति २०८३ भाद्र ५ गते शुक्रबारका दिन प्रथम त्रैमासिक परीक्षाको नतिजा प्रकाशन, पुरस्कार वितरण तथा अभिभावकहरूसँगको अन्तर्क्रियासहितको प्रगति विवरण हस्तान्तरण कार्यक्रम भव्य रूपमा सम्पन्न भएको छ । चापाकोट नगरपालिकाका सम्पूर्ण सामुदायिक तथा संस्थागत विद्यालयहरूमा एकरूपता कायम गर्ने नीति अनुसार गत असार ११ देखि १९ गतेसम्म वर्षेविदा अघि सञ्चालित प्रथम त्रैमासिक परीक्षाको नतिजा औपचारिक समारोहका बीच सार्वजनिक गरिएको हो ।

विद्यालय व्यवस्थापन समितिका अध्यक्ष राजेन्द्रबहादुर थापाको अध्यक्षतामा आयोजित उक्त कार्यक्रममा विद्यालय व्यवस्थापन समितिका निवर्तमान अध्यक्ष तिलकबहादुर खाँण प्रमुख अतिथिका रूपमा उपस्थित हुनुहुन्थ्यो । समारोहमा वर्तमान तथा भूतपूर्व विद्यालय व्यवस्थापन समितिका पदाधिकारी, संस्थापक, सल्लाहकार, अक्षयकोषदाता, शिक्षक-अभिभावक सङ्घ एवं टोल शिक्षा समितिका सदस्यहरू, स्थानीय युवा क्लब, बाल क्लब, नेपाल रेडक्रस सोसाइटीका प्रतिनिधिहरू, छिमेकी विद्यालयका शिक्षक-विद्यार्थी, अभिभावक तथा शिक्षाप्रेमी महानुभावहरूको बाक्लो उपस्थिति रहेको थियो ।

कार्यक्रमको शुभारम्भमा शिक्षक सङ्गीता पौडेलले स्वागत मन्तव्य व्यक्त गर्दै उपस्थित सम्पूर्ण अतिथि तथा अभिभावकहरूलाई शब्दद्वारा आदरपूर्वक स्वागत गर्नुभयो । तत्पश्चात् परीक्षाको समग्र नतिजाबारे विश्लेषणात्मक टिप्पणी प्रस्तुत गर्दै शिक्षक जगदीशप्रसाद यादवले अपेक्षित प्रतिफल हासिल गर्न शिक्षक, विद्यार्थी र अभिभावक तीनै पक्ष उत्तिकै जिम्मेवार हुनुपर्ने बताउनुभयो । उहाँले शैक्षिक गुणस्तरमा सुधार ल्याउन विद्यार्थी स्वयं निरन्तर अभ्यस्त रहनुपर्ने र अभिभावकहरूले पनि घरमा सोही अनुसारको अनुकूल वातावरण सिर्जना गरिदिनुपर्नेमा विशेष जोड दिनुभयो ।

कार्यक्रममा मन्तव्य राख्दै विद्यालयका सहायक प्रधानाध्यापक पशुपति पौडेलले विद्यालयमा शिक्षक, विद्यार्थी र अभिभावकहरूबीच प्रत्यक्ष एवम् त्रिकोणात्मक सम्बन्ध कायम हुनुपर्नेमा जोड दिनुभयो । उहाँले विद्यार्थीमा रहने कडा अनुशासन र समर्पणबाट मात्र विद्यालयको शैक्षिक गुणस्तर अभिवृद्धि तथा चौतर्फी विकासको परिकल्पना साकार हुन सक्ने कुरा प्रष्ट पार्नुभयो ।

यसैगरी विद्यार्थी प्रतिनिधिको रूपमा कक्षा १० की छात्रा इस्मी थापा र छात्र रोशन क्षेत्रीले मन्तव्य राख्दै विद्यालयले विगतमा कायम गरेका ऐतिहासिक कीर्तिमान र साखलाई जोगाइराख्न आफूहरू पूर्ण निष्ठाका साथ लाग्ने प्रतिबद्धता जनाउनुभयो । समारोहमा प्रतिवेदन प्रस्तुत गर्दै विद्यालयका प्रधानाध्यापक लेसबहादुर खाँणले प्रथम त्रैमासिक परीक्षाको शैक्षिक तथा आर्थिक फेहरिस्त, नतिजा मूल्याङ्कनका आधार, विद्यालयका सबल एवं सुधारयोग्य पक्षहरू, भावी कार्ययोजना र संक्षिप्त बजेटको रूपरेखा स्पष्ट रूपमा सभासमक्ष राख्नुभयो । साथै, शिक्षक अभिभावक संघका अध्यक्ष मोहन बहादुर खाँणले विद्यालयको विद्यालयले हालसम्म गरेको प्रसंशानीय उपलब्धिको उद्धरण गर्दै आगामी दिनहरुमा पनि सोही इतिहास दोहोरिने गरि मेहनत गर्न विद्यार्थीहरुलाई आग्रह गर्दै आफ्नो मनतव्य व्यक्त गर्नुभयो ।  

कार्यक्रमका प्रमुख अतिथि एवं निवर्तमान वि.व्य.स. अध्यक्ष तिलकबहादुर खाँणले विद्यालयलाई आधुनिक प्रविधिमैत्री शिक्षण-सिकाइमा रूपान्तरण गर्न आवश्यक पर्ने प्रोजेक्टरको व्यवस्थाका लागि चापाकोट नगरपालिकाका नगरप्रमुखसँग समन्वय भइरहेको जानकारी दिनुभयो । उहाँले विद्यालयको सर्वाङ्गीण विकास र स्तरोन्नतिका लागि आफू सधैँ प्रत्यक्ष वा परोक्ष रूपमा क्रियाशील रहिरहने प्रतिबद्धता समेत व्यक्त गर्नुभयो ।

विद्यार्थी प्रतिभा प्रस्तुतिहरूका साथ अघि बढेको उक्त कार्यक्रममा कक्षा नर्सरीदेखि कक्षा १० सम्मका विद्यार्थीहरूको नतिजा घोषणा गरिएको थियो । नतिजा सुनुवाइसँगै उत्कृष्ट स्थान हासिल गर्ने मेधावी विद्यार्थीहरूलाई पुरस्कार तथा प्रमाणपत्र प्रदान गरियो । साथै, अनुशासित, नियमित सरसफाइमा उत्कृष्ट योगदान दिने तथा अतिरिक्त क्रियाकलापमा उत्कृष्ट कार्यसम्पादन गर्ने विद्यार्थीहरूलाई पनि विधागत रूपमा पुरस्कृत गरिएको थियो । कार्यक्रम शिक्षक गोकर्ण जी.सी.ले कुशलतापूर्वक सञ्चालन गर्नुभएको थियो ।

कार्यक्रमको समापन गर्दै अध्यक्ष राजेन्द्रबहादुर थापाले व्यवस्थापन समितिको नेतृत्वको हैसियतले आफूले पाएको जिम्मेवारी निष्ठापूर्वक पूरा गरिरहेको बताउनुभयो । उहाँले विद्यार्थीहरूलाई सिकाइ प्रक्रियामा सधैँ अभ्यस्त रहन प्रोत्साहन गर्दै कार्यक्रम सफल पार्न सहयोग गर्ने सम्पूर्ण अतिथि, शिक्षक तथा अभिभावकहरूलाई धन्यवाद ज्ञापन गर्नुभयो । औपचारिक समारोहको समाप्ति लगत्तै प्रत्येक कक्षामा शिक्षक, विद्यार्थी, अभिभावक, प्रधानाध्यापक र व्यवस्थापन समितिका प्रतिनिधिहरूबीच विद्यार्थीको व्यक्तिगत शैक्षिक प्रगति र आचरणबारे सघन अन्तर्क्रिया गर्दै प्रगति विवरण पत्र वितरण गरिएको थियो ।

अपडेट
लोडिङ हुंदै छ...