२०८३ वैशाख २५
श्री खड्गकाली मा.वि. चापाकोट-४, घुर्लिचौर स्याङ्जामा मिति २०८३ वैशाख २५ गते ६३ औं विद्यालय वार्षिकोत्सव तथा अभिभावक दिवस विद्यालय व्यवस्थापन समितिका अध्यक्ष तिलक बहादुर खाँणको अध्यक्षता र गण्डकी प्रदेश सभाका माननीय सदस्य महेश भट्टराईको प्रमुख आतिथ्यतामा भव्यताका साथ सम्पन्न भएको छ ।
शिक्षक संगिता पौडेलको स्वागत मन्तव्यबाट प्रारम्भ भएको उक्त समारोहमा जिल्ला समन्वय समिति सदस्य गिता खाँण, प्रधानाध्यापक लेस बहादुर खाँण र सहायक प्र.अ. पशुपति पौडेल विशिष्ट अतिथिका रूपमा रहनुभएको थियो । कार्यक्रममा विद्यालय व्यवस्थापन समिति र शिक्षक अभिभावक संघका पदाधिकारीहरू, अक्षयकोष दाता, समाजसेवी तथा वडा नं. ४ का वडा सदस्यहरूको गरिमामय उपस्थिति थियो । त्यसैगरी, विद्यालयका संस्थापक, सल्लाहकार, पूर्व पदाधिकारीहरू, राजनीतिक दलका प्रतिनिधि, टोल शिक्षा समिति, आमा समूह तथा युवा क्लबका प्रतिनिधिहरू पनि अतिथिका रूपमा सहभागी हुनुहुन्थ्यो । समारोहमा छिमेकी विद्यालयका शिक्षक-विद्यार्थी, रेडक्रस, बाल क्लबका प्रतिनिधि र अभिभावकहरूको समेत उल्लेख्य सहभागिता रहेको थियो ।
औपचारिक सत्रमा प्रधानाध्यापक लेस बहादुर खाँणले विद्यालयको ऐतिहासिक पृष्ठभूमि र शैक्षिक प्रगतिको अवस्थासहित आर्थिक वर्ष २०८१/०८२ को आयव्यय विवरण प्रस्तुत गर्नुभयो । परीक्षा समिति संयोजक जगदिश प्रसाद यादवले विद्यार्थी, विद्यालय र समुदायबीचको त्रिकोणात्मक सम्बन्धको महत्वमाथि प्रकाश पार्नुभएको थियो । उहाँले वर्तमान अवस्थाको भन्दा अब्बल खालको शैक्षिक उपलब्धि हासिल गर्ने गरि आगामी शैक्षिक सत्रलाई थप फलदायी बनाउने कुरामा प्रतिबद्धता जाहेर गर्दै आफ्नो मनतब्य दिनुभयो ।
एवम् रितले विशिष्ट अतिथिको रुपमा रहनुभएको गिता खाँण र पशुपति पौडेलका साथै अतिथिमा रहनुभएको शिक्षक अभिभावक संघका अध्यक्ष मोहन बहादुर खाँण, शिक्षा प्रेमी तथा समाजसेवी नारायणराज पौडेल र अन्य आमन्त्रित अतिथि लगायतले विद्यालयको सुरुवाती दिनहरुको अवस्थाको स्मरण र विद्यालयको सर्वाङ्गिण विकासका सन्दर्भमा आ-आफ्नो धारणा राख्दै वर्तमान अवस्थामा आइपुग्दा मारेको फड्कोप्रति खुसी प्रकट गर्दै विद्यालयलाई नयाँ आयममा पुर्याउन सबै जना आफ्नो कर्तव्यप्रति विमुख भएर लाग्नपुर्ने बताउनुभयो ।
विद्यार्थीका तर्फबाट प्रतिनिधिमूलक रुपमा कक्षा १० का रोशन क्षेत्री र इस्मी मल्लले मन्तव्य राख्दै विद्यार्थीहरुको गहनाको रुपना रहने अनुशासनलाई सबैले पालना गर्दै आफ्नो कर्तव्य र जिम्मेवारीप्रति सधैं अभ्यस्त भएर मेहनत गर्ने र विद्यालयको प्रगतिको कामना गर्दै विद्यालयको नतिजालाई अझ सुझार गरि प्रतिस्ठा बढाउने प्रतिबद्धता जाहेर गरे ।
कार्यक्रममा प्रमुख अतिथि महेश भट्टराईसहितले आफूलाई २०७९ मा सर्वाधिक मतले प्रदेशमा विजयी बनाउनुभएकोले सम्पूर्ण मतदातालाई धन्यवाद दिँदै ६३ औं वार्षिकोत्सव मनाउन सफल भएकोमा समग्र विद्यार्थी र विद्यालय परिवारलाई बधाई दिनुहुँदै विगतमा दिनहरुमाझैं आगामी दिनहरुमा पनि यस विद्यालय, कालिगण्डकी भेग तथा समग्र गण्डकी प्रदेशको भौतिक तथा शैक्षिक उन्नयनमा आफूले सक्रिय भूमिका निर्वाह गर्ने प्रतिबद्धता जाहेर गर्नुभयो ।
विद्यार्थीहरूले विभिन्न आकर्षक गायन, नृत्य, कविता वाचन तथा विविध सांस्कृतिक कार्यक्रमहरू प्रस्तुत गरी समारोहलाई थप रोचक बनाएका थिए । कार्यक्रममा खेलकुद तथा वार्षिक परीक्षा २०८२ को कक्षा नर्सरीदेखि १० सम्मका उत्कृष्ट विद्यार्थीहरूलाई पुरस्कार वितरण गरिएको थियो, जसमा कक्षा नर्सरी देखि ५ सम्मका विद्यार्थीहरूलाई शिक्षक शान्ति गुरुङले आफ्नो जन्मदिनको उपलक्ष्यमा सौजन्य गर्नुभएको स्टेशनरी र मेडल प्रदान गर्नुभयो । अन्य कक्षाहरुलाई र विधागत पुरस्कार भने विद्यालयले प्रदान गरेको थियो । शिक्षक गोकर्ण जिसीले कक्षा ६ देखि १० सम्मका हरेक कक्षाको १/१ जना छात्र र छात्रालाई आफ्नो जन्मदिनको उपलक्ष्यमा घोषणा गर्नुभएको उत्कृष्ट परियोजना कार्य गर्ने विद्यार्थीलाई पुरस्कृत गर्नुभयो ।
अनुशासित विद्यार्थीको रुपमा कक्षा ६ बाट बिनिता गुरुङ र कक्षा १० बाट बिनोद खाँण पुरस्कृत भएका छन् । सरसफाइ तर्फ कक्षा ६ को अनमोल खाँण र कक्षा ६ का नमिस्का पौडेल पुरस्कृत भएकी छन् । यसैगरी, अन्तरसदनात्मक भलिबल र अन्य खेलकुद प्रतियोगिताका विजयी टोलीहरूलाई पनि पुरस्कृत गरियो ।
शैक्षिक उत्कृष्टताको क्षेत्रमा आधारभूत तह परीक्षा (BLE) २०८२ मा उत्कृष्ट अंक ल्याउने मेलिना हिताङलाई रु. ३,०००, SEE २०८१ तर्फ स्मृति बि.सी. र मनोज पंगेनीलाई जनही रु. ५,००० तथा वार्षिक परीक्षा २०८२ मा विद्यालय सर्वोत्कृष्ट हुने विशुम खाँण र दिप्सन थापालाई नगद रु. १,५०० सहित छात्रवृत्ति कोषबाट सम्मानित गरियो । साथै, वि.व्य.स. अध्यक्ष तिलक बहादुर खाँण र गल्कोट मा.वि.को पूर्व शिक्षक चक्रपाणि कंडेलले समेत विद्यार्थीहरूलाई व्यक्तिगत तर्फबाट नगद प्रोत्साहन पुरस्कार प्रदान गर्नुभएको थियो ।
विद्यालयको भौतिक र शैक्षिक विकासमा पुर्याएको योगदानको उच्च कदर गर्दै अभिभावकहरू रुद्र बहादुर सिंह, नारायणराज पौडेल, केशर बहादुर खाँण र ठग बहादुर थापालाई 'उत्कृष्ट अभिभावक' सम्मान प्रदान गरियो । विशेषगरी आफ्नी सुपुत्री डा. शिशिर खाँणलाई चिकित्सा क्षेत्रमा सफल बनाउन पुर्याएको त्यागको कदर गर्दै केशर बहादुर खाँण र गंगा खाँणलाई 'गौरवशाली अभिभावक' का रूपमा सम्मान गरिएको थियो ।
साथै, अक्षयकोषदाताहरु चापाकोट ४, घुर्लिचौर निवासी गिता खाँण; चापाकोट ४, घुर्लिचौर निवासी केशर बहादुर खाँण, देवेन्द्र खाँण तथा अकवर खाँण; चापाकोट ४, घुर्लिचौर (हाल हङकङ) निवासी जीवन खाँण र सिता खाँण; चापाकोट ४, घुर्लिचौर निवासी राजेन्द्र बहादुर थापा एवम् चापाकोट ४, सिब्दी निवासी श्री सुमित्रा गिरीहरुलाई समेत सम्मान गरिएको थियो ।
शिक्षकहरूको व्यावसायिक दक्षताको मूल्यांकन गर्दै गोकर्ण जिसी (परियोजना कार्य र उत्कृष्ट SEE GPA), विष्णु पौडेल (प्रविधिमैत्री शिक्षण), भूमिका थापा (सर्वाधिक खालि कक्षा व्यवस्थापनमा सहयोग), पशुपति पौडेल (निःशुल्क अतिरिक्त कक्षा सञ्चालन), जगदिश प्रसाद यादव (कर्तव्यबोध र टिम स्पिरिट) र ३६ वर्षभन्दा बढी सेवा गर्नुभएका शिव गिरीलाई 'हिरक सेवा' सम्मान प्रदान गरियो । साथै, ४० वर्षको शिक्षण सेवा र विद्यालय व्यवस्थापनमा पुर्याएको योगदानको सम्मानस्वरूप हालै सेवा निवृत्त हुनुभएका सहायक प्र.अ. तथा लेखा व्यवस्थापक राजेन्द्र बहादुर थापालाई विशेष सम्मान गरियो ।
शैक्षिक सत्र २०८२ को उत्कृष्ट विद्यार्थी (Student of The Year 2082) हाल कक्षा १० मा अध्यनरत छात्रा इस्मी मल्ल भएको छ । उनलाई वि.व्य.स.पूर्व अध्यक्ष देबेन्द्र खाँणले बेस्ट स्टुडेन्ट स्यास, प्रमाणपत्र र अन्य पुरस्कारले सम्मान गर्नुभयो । त्यसैगरी, २०८२ को उत्कृष्ट सदन (House of the year) उपाधी कक्षा १-५ को कञ्चनगंघा र कक्षा ६-१० को अन्नपूर्ण सदनले हाँसिल गरेका छन् । हाउस अफ दि इयर सदनहरुलाई ट्रफी प्रदान गरिएको थियो, जुन दर्शन सेवा समाज घुर्लिचौरले प्रायोजन गरेका थिए ।
कार्यक्रममा अतिथिहरुलाई 'मायाको चिनो' प्रदान गरिएको थियो भने गल्कोट मा.वि.को पूर्व शिक्षक चक्रपाणि कंडेललाई सम्मान गरिएको थियो । विद्यालय व्यवस्थापन समितिका अध्यक्ष तिलक बहादुर खाँणले कार्यक्रमको समापन गर्दै विद्यालयको विकासमा सहयोग गर्ने सबैलाई धन्यवाद ज्ञापन गर्नुभयो । कार्यक्रमको सञ्चालन शिक्षक गोकर्ण जिसीले गर्नुभएको थियो भने अन्त्यमा सहभागी सबैका लागि जलपानको व्यवस्था गरिएको थियो ।
